Köçmək üçün - Ən yaxşı ölkələr

2026-cı ilin köçmək üçün ən yaxşı ölkələri açıqlanıb.

“Qafqazinfo” xəbər verir ki, bu, “Remitly”nin “İmmiqrasiya İndeksi 2026” siyahısında əksini tapıb.

İndeks qida, kirayə, ipoteka, alıcılıq qabiliyyəti, mədəniyyət, təhsil sistemi, xoşbəxtlik, səhiyyə, təhlükəsizlik və əməkhaqqı daxil olmaqla, 34 göstərici əsasında ölkələri qiymətləndirir.

Bu il İsveçrə birinci yeri tutub, keçən il ikinci olan ölkə hazırda həm gəlir potensialı, həm səhiyyə, həm də təhlükəsizlik sahələrində fərqlənir.

“Remitly”nin açıqlamasına görə, İsveçrə “müstəsna qazanc potensialı, güclü səhiyyə sistemi, yüksək təhlükəsizlik standartları və uzunmüddətli mövcud immiqrant icması ilə seçilir”.

Beynəlxalq məktəblərin müxtəlifliyi, inkişaf etmiş enerji və ictimai xidmət infrastrukturu ölkəni daha da cəlbedici edir.

2026-cı ildə köçmək üçün ən çox immiqrant dostu olan ölkələr

İsveçrə

İslandiya

Lüksemburq

Avstraliya

Almaniya

İrlandiya

ABŞ

Danimarka

Norveç

İspaniya

İslandiya qazanc potensialı, təhlükəsizlik və ətraf mühit göstəricilərinə görə ikinci yerdədir. Lüksemburq üçüncü yeri tutaraq, Avropanın mərkəzində sabitlik və yüksək həyat səviyyəsi axtaranlar üçün cəlbedici hesab olunur. Avstraliya isə immiqrant dostu cəmiyyəti və açıq hava həyat tərzi ilə dördüncü yerdə qərarlaşıb. İlk beşliyi Almaniya tamamlayır.

Ailə dostu siyasət və yaşayış şəraiti baxımından İspaniya birinci yerdədir. Ölkə analıq və atalıq məzuniyyəti, uşaq baxımı xərcləri və beynəlxalq məktəb sayına görə yüksək qiymətləndirilir. Bu kateqoriyada Böyük Britaniya səkkizinci, İslandiya doqquzuncu, Xorvatiya isə onuncu yerdədir.

Yaşayış xərcləri və gəlir balansına görə Səudiyyə Ərəbistanı birinci yerdədir. Avropada isə Norveç dördüncü, Danimarka beşinci yerdədir. Lüksemburq səkkizinci, İrlandiya isə doqquzuncu sıradadır. İlk 10-luqdakı digər ölkələr Banqladeş, ABŞ, Oman, Pakistan və Nepalı əhatə edir.