Abşeron Xəstəxanasında niyə KT cihazı yoxdur?

Məlum olduğu kimi, iki gün əvvəl tanınmış vəkil Fərhad Mehdiyevin 17 yaşlı qızı Zəhra Bakı-Sumqayıt yolunda motosikletlə ağır qəzaya düşərək həlak olub.

“Qafqazinfo” xəbər verir ki, ötən gün açıqlama verən vəkil övladını ağır vəziyyətdə Abşeron Rayon Mərkəzi Xəstəxanasına çatdırdıqlarını, lakin orada müayinə üçün KT (Kompüter Tomoqrafiyası) cihazının olmadığını açıqlamışdı.

“Qızım xəstəxanaya çatdırıldı. Mən təəssüflə bildirirəm ki, onu transport etmək mümkün deyildi. Abşeron Rayon Mərkəzi Xəstəxanasında KT aləti yoxdur. Biz onu tərpədə bilmədiyimizə görə, başqa xəstəxanaya köçürə bilmədik. Neyrocərrahiyyə və ya Bakı Sağlamlıq Mərkəzinə köçürməyimiz alınmadı...”, - F.Mehdiyev bildirib.

Məlumat üçün bildirək ki, Kompüter Tomoqrafiyası daxili orqanların, sümüklərin, yumşaq toxumaların və qan damarlarının təfsilatlı görüntüsünü əldə etmək üçün istifadə olunan şüa diaqnostikası metodudur. Bu metodun əsasını rentgen şüalarının istifadəsi təşkil edir. KT cihazları diaqnostik şöbəsi olan əksər özəl və dövlət tibb müəssisələrində mövcuddur.

Abşeron Rayon Mərkəzi Xəstəxanasının çoxprofilli tibb müəssisəsi olduğunu, təkcə Bakıdan deyil, regionlardan da kütləvi xəstə qəbul etdiyini nəzərə alsaq, bu xəstəxanada hazırda KT cihazının olmaması sual doğurur.

Maraqlıdır ki, bir neçə ay əvvəl sözügedən xəstəxanada KT xidməti göstərilib. Amma bir müddət qabaq KT aləti ilə bağlı texniki nasazlıq yaranıb. Görünən odur ki, bir çox pasiyent üçün həyati əhəmiyyət kəsb edən xidmətin bərpasına kifayət qədər önəm verilmir.

Problemlə bağlı TƏBİB-ə ünvanladığımız sorğuya belə cavab aldıq: “Məlumat üçün bildiririk ki, 2008-ci il təvəllüdlü şəxs (qadın) 16.06.2026-cı il tarixində saat 17:00 radələrində Abşeron Rayon Mərkəzi Xəstəxanasının Təcili tibbi yardım şöbəsinə gətirilib.

Xəstəyə qəbul olunduğu andan etibarən vəziyyətinin ağırlığı nəzərə alınaraq təxirəsalınmaz tibbi yardımlar göstərilib. Qarın, bel və çanaq nahiyəsinin dəqiqləşdirilməmiş travması, digər kəllədaxili travmalar, boyun nahiyəsinin dəqiqləşdirilməmiş travması, dəqiqləşdirilməmiş pnevmotoraks, ön qol sümüklərinin digər hissələrinin sınığı, bud sümüyünün digər hissələrinin sınığı, bud nahiyəsinin açıq yarası diaqnozları təyin edilən pasiyentə zəruri müayinə və müalicə tədbirləri həyata keçirilib.

Xəbəri rus dilində oxuyun: Почему в Абшеронской больнице нет аппарата КТ?

Həkimlər tərəfindən aparılan intensiv müalicə və reanimasiya tədbirlərinə baxmayaraq, xəstənin həyati funksiyalarını bərpa etmək mümkün olmayıb və 16.06.2026-cı il tarixində saat 20:20 radələrində bioloji ölüm faktı qeydə alınıb.

Qeyd edək ki, xəstənin xəstəxanaya daxil olduğu andakı vəziyyəti son dərəcə ağır, həyati göstəriciləri qeyri-sabit olub. Bu səbəbdən xəstənin KT (kompüter tomoqrafiyası) müayinəsinə aparılması tibbi baxımdan mümkün olmayıb.

Əlavə olaraq bildiririk ki, radioloji tibbi xidmətlərin daha da təkmilləşdirilməsi məqsədilə TƏBİB tərəfindən müasir tibbi texnologiyaların tətbiqi ilə bağlı zəruri tədbirlər həyata keçirilir. Əsas prioritet bütün tibb müəssisələrinin radioloji avadanlıqlarla təchiz edilməsi deyil, pasiyentlərin tibbi xidmətlərə əlçatanlığının təmin edilməsi istiqamətində vahid radioloji tibbi xidmətlərin göstərilməsi üçün şəraitin yaradılmasıdır”.

Gülnar Əliyeva