29 yaşında A Seriyasında baş məşqçi oldu

İtaliyanın “Parma” klubu baş məşqçi vəzifəsində Karlos Kuestanı təyin edib.

“Qafqazinfo” xəbər verir ki, bu barədə klubun rəsmi saytı məlumat yayıb.

29 yaşlı mütəxəssislə müqavilə 30 iyun 2027-ci ilə qədər nəzərdə tutulub.
İspaniyalı məşqçi rəsmi olaraq 26 iyunda ictimaiyyətə təqdim olunacaq.

Qeyd edək ki, futbolçu karyerasını 18 yaşında başa vuran Kuesta daha sonra məşqçiliyə başlayıb. O, “Atletiko”nun U-17 komandasında, “Yuventus”un aşağı yaş qruplarında çalışıb, 2020-ci ildən etibarən isə “Arsenal”da Mikel Artetanın məşqçilər korpusunda yer alıb.

Kuesta İtaliya A Seriyası tarixində ikinci ən gənc baş məşqçidir. Birinci yerdə 1939-cu ildə “Triestina”nın 29 yaş 9 aylığında baş məşqçisi olan Elio Loski yer alır. İtaliya çempionatının yeni mövsümü isə 24 avqustda start götürəcək və həmin gün Kuestanının 30 yaş 25 günü tamam olacaq.

Qeyd edək ki, “Parma” bu ayın əvvəlində keçmiş baş məşqçi Kristian Kivu ilə yollarını ayırmış və onun “İnter”ə keçdiyini açıqlamışdı. Komanda ötən mövsüm İtaliya A Seriyasında 16-cı yerdə olaraq elitada qalmağı bacarıb.