“Biz də istəyirik ki, müəllimlərin maaşı artsın” - Nazir müavini

“Biz də istəyirik ki, müəllimlərin əməkhaqqısı artsın”.

“Qafqazinfo” xəbər verir ki, bunu elm və təhsil nazirinin müavini İdris İsayev Milli Məclisin bu gün keçirilən plenar iclasında “Ümumi təhsil haqqında” qanun layihəsinin müzakirəsi zamanı deyib.
“Sertifikatlaşdırma prosesi yekunlaşdıqdan sonra müəllimlərin əməkhaqqısında ciddi artım mövcuddur. Əməkhaqqı artımı ümumtəhsil sistemində dərs saatlarına bağlıdır. Kimin dərs saatı çoxdursa, onun əməkhaqqısı daha çoxdur. Dərs saatlarının bölgüsünə diqqət yetirsək, 24 saat dərs saatı olan müəllimlərin sayı 30,6 faizdir, 29,4 faizinin dərs saatı 24 saatdan çoxdur. Onların maaşı 1300-1500 manat arasında dəyişir. Müəllimlərin orta aylıq əməkhaqqı 1000 manata yaxındır. Sertifikatlaşdırma prosesi yekunlaşdıqdan sonra əməkhaqqıda artımlar olacaq. Növbəti mərhələdə müəllimlərin əməkhaqqısının artırılmasının digər həll yollarını düşünürük. Bu barədə təkliflərimizi təqdim edəcəyik”, - deyə nazir müavini bildirib.

İdris İsayev əlavə edib ki, müəllimlərin işə qəbul prosesinə dövlət müəyyən vəsait sərf edir: “Orta hesabla biz müəllimlərin işə qəbuluna ildə təxminən 2.5-3 milyon manat vəsait sərf edirik. Nəticədə müraciət edib və imtahanda iştirak etməyən şəxslərə sərf olunan xərclər əsassız hesab olunur və təyinatı üzrə istifadə edə bilmirik. Bu, təxminən ildə 500-600 min manat civarındadır. Biz bu məbləğlə təqribən 200 tələbənin təhsilhaqqısını ödəyə bilərik. Belə çıxır ki, bu xərclər dövlət büdcəsindən təyinatı üzrə istifadə olunmur”.