Prezident İlham Əliyev misilsiz formada Azərbaycan xalqını bir araya gətirdi - Nil Vatson

Prezident İlham Əliyev misilsiz formada Azərbaycan xalqını bir araya gətirdi.

Bu barədə Trend-ə Böyük Britaniyadan olan politoloq və jurnalist Nil Vatson deyib.

"Prezident İlham Əliyev beynəlxalq arenada məharətli siyasətçi və diplomatdır, onun xarizmatik yanaşması isə həm ölkə daxilində, həm də xaricdəki azərbaycanlıları misilsiz formada bir araya gətirib", - Vatson deyib.

Ekspertin sözlərinə görə, son 20 il ərzində Azərbaycan Prezidenti İlham Əliyevin rəhbərliyi altında İsrail və Türkiyə ilə uğurlu əməkdaşlıq qurub. Bu əməkdaşlıq ölkənin hərbi potensialını artırmasına imkan verib.

Vatson ötən dövr ərzində Azərbaycan Prezidenti İlham Əliyevin Avropa ölkələri ilə xüsusən enerji sektorunda möhkəm ikitərəfli əlaqələr qurduğunu əlavə edib.

Ekspert Azərbaycanın Avropa ölkələri, xüsusən Böyük Britaniya ilə möhtəşəm ikitərəfli əlaqələrin formalaşdığını və Böyük Britaniyanın bp şirkəti ilə karbohidrogen hasilatı və kəşfiyyatı üzrə uğurlu əməkdaşlığın bunu təsdiqlədiyini vurğulayıb.

"Bundan başqa, Azərbaycan-İtaliya münasibətləri, o cümlədən neft-qaz sahəsində uğurla inkişaf edir. Avropa ölkələri ilə münasibətlərdə yeganə problem mühüm erməni diasporunun və ya islamofobiya və yaxud türkofobiyanın olduğu yerlərdə meydana çıxır ki, Fransa buna misaldır. Bu, həmçinin Avropa təşkilatlarında ermənipərəst və anti-Azərbaycan mövqenin formalaşmasına səbəb olur", - o deyib.

Ekspert qarşıdakı Prezident seçkilərinin müstəqillik əldə olunduqdan sonra ilk dəfə olaraq bütün Azərbaycan ərazisində keçiriləcəyinin əhəmiyyətini vurğulayıb.

"2-ci Qarabağ müharibəsi və Xankəndidə qanunsuz rejimin ləğvindən sonra Azərbaycan bütün ərazisi üzərində nəzarəti bərpa etdi. Azərbaycanın bütün ərazisində ümummilli seçkilər keçirə biləcəyi vaxt gəlib çatdı", - deyə ekspert sonda bildirib.