Gürcüstanda çin dili məktəb proqramına daxil edilə bilər

Gürcüstanda çin dilinin tədrisi məktəb proqramlarına daxil edilə bilər.

“Qafqazinfo” Gürcüstan mediasına istinadən xəbər verir ki, bu barədə məlumatı ökənin Təhsil, Elm və Gənclər Nazirliyi yayıb.

Bildirilib ki, Gürcüstanın təhsil naziri Aleksandr Çuladze ümumi təhsilin yeni konsepsiyasını təqdim edib. Burada yer alan yeniliklərdən biri çin dilinin ikinci əcnəbi dil kimi tətbiq edilməsi və müvafiq tədris resurslarının yaradılmasıdır.

Nazirlik qeyd edib ki, buna səbəb məktəblilər tərəfindən çin dilinə artan maraqdır. Hazırda Gürcüstanın dövlət məktəblərində iki xarici dilin öyrənilməsi məcburidir. Şagirdlər ingilis dilini birinci sinifdən öyrənməyə başlayır, ikinci xarici dili isə 5-ci sinifdə olarkən seçirlər.

Məktəblər uşaqlara seçim üçün minimum iki xarici dil təklif etməlidirlər. Burada isə ikinci xarici dil olaraq əsasən rus, alman, fransız və italyan dili təklif olunur.

Qeyd edək ki, 2023-cü ilin yayında Gürcüstanın o dövrdəki Baş naziri İrakli Qaribaşvili ibtidai və orta məktəblərdə çin dilinin tədrisinə başlanacağını bildirmişdi. Bu zaman Gürcüstan və Çin iki ölkə arasında strateji tərəfdaşlıq əlaqələrinin qurulduğunu bəyan etmişdilər. Bu isə Gürcüstanın Qərb tərəfdaşlarının tənqidinə səbəb olmuşdu.