Çin ABŞ şirkətlərinə sanksiya tətbiq edəcək

Pekin ABŞ-ın Tayvan administrasiyasına silah tədarükü, Vaşinqtonun Çin müəssisələri və fiziki şəxsləri ilə bağlı məhdudiyyətləri ilə əlaqədar ABŞ-ın beş şirkətinə qarşı cavab sanksiyaları tətbiq edəcək.

Bu barədə Çinin Xarici İşlər Nazirliyi xəbər yayıb.

“ABŞ Çinin Tayvan bölgəsinə silah satmaqla “vahid Çin” prinsipini açıq şəkildə pozur və müxtəlif bəhanələrlə Çin müəssisə və şəxslərinə qarşı qeyri-qanuni birtərəfli sanksiyalar tətbiq edir”, - Xarici İşlər Nazirliyinin saytında dərc olunan bəyanatda deyilir.

ABŞ tərəfinin yuxarıda göstərilən ciddi qanun pozuntularına cavab olaraq, ÇXR-in “Xarici sanksiyalara qarşı Qanunu”na əsasən, Pekin “BAE Systems Land and Armament”, “Alliant Techsystems Operation”, “AeroVironment”, “ViaSat” və “Data Link Solutions” şirkətlərinə qarşı sanksiyalar tətbiq etmək qərarına gəlib.

Xarici İşlər Nazirliyi aydınlaşdırıb ki, tətbiq edilən sanksiyalar bu şirkətlərin Çin ərazisindəki daşınmaz əmlakı da daxil olmaqla aktivlərinin dondurulmasını nəzərdə tutur.

“Təşkilatlar və şəxslərə onlarla əqdlər bağlamaq, əməkdaşlıq etmək və ya digər qarşılıqlı fəaliyyət növlərini həyata keçirmək qadağandır”, - bəyanatda vurğulanır.