“Heç özüm də özümü müdafiə etməyəcəm”

143 milyonluq yeyintidə təqsirli bilinən general Nizami Məmmədov və onunla birgə ittiham olunan zabitlər yenidən hakim qarşısına çıxarılıblar.

“Qafqazinfo”nun məlumatına görə, 11 il yarıma kimi həbsə məhkum edilən zabitlər cəzalarının yüngülləşdirilməsini istəyirlər.

Ordudakı məniməsməyə görə çoxsaylı zabitlər cinayət məsuliyyətinə cəlb edilib.

Onlardan dördü- Müdafiə Nazirliyinin Maliyyə və Büdcə İdarəsinin sabiq rəisi Nizami Məmmədov və qoşun növlərinin maliyyə-xidmət rəisləri polkovniklər Bayram Bayramov və Cəlal Kazımov, həmçinin Vüsal Əlizadə birgə mühakimə edilir.

Şikayətlər Bakı Apellyasiya Məhkəməsində hakim İbrahim İbrahimlinin sədrliyi ilə araşdırılır.

General Məmmədovu bu dəfə də vəkillər Rəşad Mirmehdizadə və Faiq Hüseynov müdafiə edir. Onlar bəlli saatda məhkəmə salonunda olublar.

Amma təqsirləndirilən şəxslərdən ikisi-Cəlal Kazımov və Vüsal Əlizadə heç bir vəkillə müqavilə bağlamayıblar.

V.Əlizadə dövlət hesabına vəkil istəsə də, Kazımov ondan da imtina edir, ümumiyyətlə müdafiə edilmək istəmir:

“Heç özüm də özümü müdafiə etməyəcəm. Konkret olaraq müdafiədən imtina edirəm.”

Müdafiədən imtina edən polkovniki birinci instansiyada vəkil Əli Adıgözəlov müdafiə edirdi. Maraqlıdır ki, eyni vəkil indi Kazımovun keçmiş həyat yoldaşını və yaxınlarını müdafiə edir. Cinayət işi üzrə onların da adına rəsmiləşdirilmiş əmlaklar müsadirə edilmişdi. Bu səbəbdən Kazımovlar maraqlı şəxs kimi işə qoşulublar.

Anket məlumatlarının elanı zamanı diqqət çəkən başqa bir məqam isə Cəlal Kazımovun boşanmasıdır. O, əvvəlki məhkəmə dövründə həyat yoldaşından rəsmən ayrılıb.

Təqsirləndirilən şəxslər və onların vəkilləri məhkəmənin baxışa təyin edilməsini istəyiblər.

Hakimlər bu məsələdə tərəflərlərlə razılaşmayıblar. Xüsusilə ağır cinayət işi üzrə iki müttəhimin vəkilləri olmadığından proses təxirə salınıb.

İlkin baxış iclasının davamı fevralın 17-si davam edəcək.

Qeyd edək ki, Müdafiə Nazirliyindəki milyonlarla mənimsəmə faktının üstü Dövlət Təhlükəsizliyi Xidməti (DTX) tərəfindən açılıb.

Bakı Hərbi Məhkəməsinin hökmü ilə Nizami Məmmədov və Bayram Bayramovun hər biri 11 il 6 ay, Cəlal Kazımov 11 il, Vüsal Əlizadə 10 il 6 ay müddətinə azadlıqdan məhrum ediliblər. İş üzrə dövlətə dəymiş ziyanın bir qismi ödətdirilib, eyni zamanda təqsirləndirilən şəxslərin üzərinə həbs qoyulan əmlaklar dövlətə dəymiş ziyanın ödənilməsinə yönləndirilməsi məqsədilə dövlət nəfinə keçirilməsi üçün müsadirə olunub.