Rayonlarda pensiya ödənişi gecikir? - Rəsmi

Bölgələrdə pensiya verilişinin gecikməsi ilə bağlı məlumatlar yayılıb.

Bu barədə “Qafqazinfo”ya Göyçay sakini Mikayıl Hacıyev də müraciət edib.

Onun sözlərinə görə, Bakı, Sumqayıt və Abşeronda pensiyaların verilməsi vaxtında təmin olunsa da, rayonlarda bu sahədə problem yaşanır: “İki aydır ki, pensiyalar ən azı 5-6 gün gecikmə ilə verilir. Bilmirik, bu gecikmənin səbəbi nədir”.

Sosial şəbəkələrdə də rayonlarda bir neçə aydır, pensiya ödənişlərində gecikmələrin olması ilə bağlı şikayətlərə rast gəlinir.

Məsələ ilə bağlı Dövlət Sosial Müdafiə Fondu ilə əlaqə saxladıq. Qurumdan sorğumuza cavab olaraq bildirildi ki, pensiya ödənişi ilə bağlı hər hansı gecikmə olmur: “Həm Bakı, həm də rayonlar üzrə pensiyaların ödənilməsində heç bir gecikmə yoxdur. Hər ay öncədən nəzərdə tutulmuş qrafikə uyğun olaraq cari ayın pensiyaları ödənilir”.